Psa 74 | NdeIBE | STEP | Kungani ususilahlile kokuphela na, hawu Nkulunkulu? Kungani ulaka lwakho luvutha phezu kwezimvu zedlelo lakho na?

Psalms 74

1 Kungani ususilahlile kokuphela na, hawu Nkulunkulu? Kungani ulaka lwakho luvutha phezu kwezimvu zedlelo lakho na?

2 Khumbula abantu owabathengayo ekadeni, isizwe selifa lakho owasihlengayo – iNtaba iZiyoni, owawuhlala khona.

3 Phendukisa izinyathelo zakho ziye kula amanxiwa anininini, incithakalo yonke le eyenziwe yisitha endlini engcwele.

4 Izitha zakho zazibhonga endaweni owawuhlangana lathi kuyo; zamisa izimpawu zazo njengeziboniso.

5 Zenza njengabantu abaphakamise amahloka ukuphendla indlela yabo eguswini.

6 Zafohloza konke okubaziweyo ngamahloka azo langezando.

7 Zatshisa indlu yakho engcwele yaphela nya; zangcolisa indawo ehlala iBizo lakho.

8 Zathi ngezinhliziyo zazo, “Sizababhuqa baphele nya!” Zatshisa zonke izindawo zokukhonzela uNkulunkulu elizweni.

9 Kasisaboniswa mimangaliso; kakuselabuphrofethi, kakho kithi owaziyo ukuthi kuzaze kube nini kunjalo.

10 Koze kube nini isitha sikuklolodela na, hawu Nkulunkulu? Izitha zizalithuka kokuphela ibizo lakho na?

11 Kungani ufinyeza isandla sakho sokunene na? Sikhuphe ezingoxweni zezambatho zakho ubabhubhise.

12 Kodwa wena Nkulunkulu unguJehova wami kwasekadeni; uletha insindiso emhlabeni.

13 Kwakunguwe owaqhekeza ulwandle ngamandla akho; wafohloza amakhanda esilo phakathi kwamanzi.

14 Kwakunguwe owachoboza amakhanda kaLeviyathini waba yikudla kwezidalwa zasenkangala.

15 Kwakunguwe owavula imithombo lemifula; womisa qha imifula eyayihlala igeleza.

16 Imini ngeyakho, ngobakho njalo lobusuku; walimisa ilanga kanye lenyanga.

17 Kwakunguwe owamisa imingcele yonke yomhlaba; wenza ihlobo kanye lobusika.

18 Khumbula ukuthi isitha besikuklolodela, Jehova, ukuthi iziwula bezihlambaza ibizo lakho.

19 Ungaqhubeli umphefumulo wejuba lakho ezinyamazaneni; ungaze wakhohlwa kokuphela impilo yabantu bakho abahluphekayo.

20 Nanzelela isivumelwano sakho, ngokuba izikhundla zobugebenga zigcwele kulo lonke ilizwe ezindaweni ezilamathunzi.

21 Ungayekeli abacindezelweyo babuyele beyangekile; sengathi abayanga labaswelayo bangalidumisa ibizo lakho.

22 Phakama, hawu Nkulunkulu, vikela okungokwakho; khumbula ukuthi iziwula zikuhleka njani ilanga lonke.

23 Ungakulibali ukuvungama kwalabo abalwa lawe, ukuxokozela kwezitha zakho, okuzwakala kokuphela.